الله يطول بعمرك يا بيي ..بحبك* جوليات أنطونيوس

النشرة الدولية –

بعيد البيّ شو بهديك يا بييّ

كل الدني ما بتطلع هديّة

كلما العرق زرزب من جبينك

وكلما انحفر همّي على سنينك

كنوز الدني بتزغر بيعينيّي

لو قلت عنّك إنت جسر البيت

بخاف الكلام يقلّ من قدرك

وان قلت انّك بالدني ضحّيت

بتميل كفّة كدّك وقهرك

شقيت تعبت تا شئننا علّيت

بشموخك تغلّبت عا دهرك

سامح يا بيي غرور قلبي فيك

حق الورد عا الغصن يدلّع

قاسي انت و العاطفي اللي فيك

بتفيق لمّا فيك بتطلّع

الناس كلّا بتشهد لماضيك

بكبر بإسمك فيك بتمثّل

جوخ الدني ما مسحت تا يعلّيك

الّا لربّك ما بتتوسّل

جايي تا بوّس دَيك يا بييّ

واتشكرك عا نعمة وجودك

فتّشت كل الارض عا هديّة

تكافي شقى ايديك وزنودك

بدّي هديّة تكون أصليّي

وما في دهب بعيار مضمونك

ما لقيت إلّا بدمع عينيّي

إغسل تعب عمرك عن جفونك

وإسكب حياتي وخمر عينيّي …

وعبّي بكاسي ضحكة عيونك ..

بحبّك يا بيّي ..