لا تسألوني بالوطن شو صار* جولييت انطوانيوس

النشرة الدولية –

لا تسألوني بالوطن شو صار

صعبة عليّ فسّر دموعي

قلبي وقع بين البحر والنار

وتخلّعت عالمرفأ ضلوعي

عم دوّر لبيروت عن شبّاك

تا إلمحا وإتخيلا بظلّو …

عن شي حدا تا إسألو شو باك

ما في حدا تركو الصدى وفلّو

يا شو انكسر تحت الكلام سكوت

بعيون نطرت أهلها يطلّو

وبيوت بابا من الكتف مفلوت

كترة ما شد الباب تا يضلّو ..

وحدا الطريق بلا حكي حكيت

عالزفت باقي دمّن محلّو

غطّت عينيها بدمّن و بكيت

ما تحمّلت دمّ الوطن كلّو ..

يا شو انكسر أحلام يا بيروت

معليش نامي اليوم موجوعة

نحنا وإنتِ بهالوطن بنموت

بكرا سوى من موتنا بنوعى ..