من هو يوسف طراد؟
بقلم: كارولين زعرب طايع
النشرة الدولية –
من هو يوسف طراد؟
بسنة ١٩٦١ ضحكت سما برحليون ورقصت أرضها
وفرحت بشري وفرح الوطن بابن الارض وابن الوطن استاذ يوسف طراد
وسنة ١٩٨١ ضحك الوطن مرة تانية لما تطوع استاذ يوسف طراد بالجيش بصفة جندي تيخدم وطنو
خدم بالجيش من قلبو وصار يترقى توصل ل رتبة مؤهل أول
وبالجيش درس العناية التمريضية وبكل الأحداث ل مرقت ع الوطن ما خاف من أي خطر وكان دايماً موجود حد كل جريح ومتأذي ليقوم بمهمتو الانسانية قبل الوطنية
نال أوسمة عديدة
وسام الوحدة الوطنية التذكاري
وسام فجر الجنوب التذكاري
وسام الاستحقاق اللبناني البرونزي وثم الفضي
وسام التقدير العسكري
المدالية العسكرية
حصل ع تنويه من قائد الجيش ١٦ مرة
وتهنئة من قائد الجيش لما كان مسؤول عن التمريض بالشمال وشال عشر مصابين من حقول الالغام
بعد.ما خدم ٢٣ سنة طلب يتقاعد ليقعد ببرحليون مع الارض والمعدور
مع الزيتون والزعتر والقرصعنة
مع نسمة الهوا ل ما بينشبع منا
نسمة برحليون
وتفرغ للقراءة والنقد والكتابة
كتب فوق ال ٢٣٠ مقالة نقدية عن كتب تاريخية ادبية سياسية دينية روايات وابحاث
ونشرت مقالاتو بعدة جرايد ورقية و الكترونية نذكر منا جريدة النهار ومون ليبان
واستاذ يوسف مشهور بكتاباتو الريفية ل بتاخدنا ع الزمن الجميل وبتذكرنا بعاداتنا وتقاليدنا
كتب عن المنجد عن المبيض عن المشحرجي
عن بياع البوظة ايام زمان ل كنا بس نسمع صوت جرس العربية ما نعرف كيف نركض تنشتري بوظة و كتير مواضيع غيرا
كان إلي الشرف اتعرف ع استاذ يوسف بالصدفة وكان إلي الشرف إنو أول شخص كتب عن كتابي كركر خيطان
استاذ يوسف منحبك كتير