الست ثريا دي تبقى ماما*عبير العربي

النشرة الدولية –

من الحاجات اللي وأنت ماشي في الحياة لازم تأثر في تاريخك وتشكيل وجدانك هي أمك في المطلق كده أمك، والحقيقة أنا ماما أثرت بشكل كبير جدا في تشكيل شخصيتي ووعي ووجداني، وكنت دايما أتأملها كونها أفرزت جوايا نتاج تولفته غريبة، استمديتها كلها منها، ومن الحاجات الكتيرة دي، يمكن خرج منها في كتابة قصة عنها عنونتها ب”الست ثريا دي تبقى ماما، في كتابي مدام بنوت.

اتكلمت فيها عن اعتزازها طوال سنوات تربيتنا بذكر اسمها بشكل مباشر ،كانت دايما تجيلي المدرسة من وأنا صغيرة وتقدم نفسها باسمها  أنا “ثريا نجم الدين” مامت عبير، لما كبرت شوية، كنت أسال نفسي ليه كل الأمهات بتقول أنا أم محمد ،أحمد  مثلا، وماما بتقول اسمها الأول، ورغم أني ماما ست ريفية من ريف الإسماعيلية ،لكن يمكن عشان باباها كان عمدة ، ورجل اقطاعي، فأرسى هو كمان قواعد مختلفة جواها، اتشكل وجداني على ضرورة وجودي، واني كائن غير مستتر، وده اللي استوقفني كتير في مرحلة حكم الإخوان وطرح السلفيين لنماذج نسائية جوه البرلمان كانت مجهولة الإسم والرمز وبدأت أستعيد تفاصيل النشأة والظروف الحياتية.

كل لحظة من عمرك يا ست ثريا وأنتي قوية وحرة وفاهمة ومستنيرة يا ابنة العمدة جدي اللي بفتخر به وبيكي، واقبلي قصتي لك هدية في عيدك.