كثير وجع يجي العيد وفي ناس جوعانة وبلا دواء
بقلم: ميساء عبد الخالق

النشرة الدولية –

كثير وجع يجي العيد وفي ناس جوعانة وبلا دواء وفي اهل مقهورين مش قادرين يأمنوا حليب واكل لاطفالهم وخايفين على اولادهم وعاجزين عن دفع اقساط المدارس والجامعات ، ما اصعب الحياة بس صار اقصى طموحنا تجي الكهرباء حتى ما يموت مرضانا الي عايشين عالاوكسيجين وما ابشع مشهد حماة الديار” الجيش وكل القوى الأمنية” مكسورين لانو معاشاتهم ما بتكفي لتأمين حاجات اهلهم وعيالهم بوقت همهم صون وامن الوطن النازف دماً من طعنات الغدر والخيانة من مسؤولين غير مسؤولين خانوا امانة لبنان فتحول من بلد الحلم الى مقبرة الاحلام، كثير محزن انو صرنا بس نسمع حدا مات نقول الحمدلله ارتاح من وجع الحياة بلبنان، كثير نغصة تمرق المناسبات السعيدة والشعب اللبناني غرقان بالقهر والحرمان وانو  ابسط حقوقنا مهدورة وما في أدنى احترام للكرامة الانسانية ويصبح الخوف رفيقنا انو نموت برصاصة طايشة على محطة بنزين وانو يصير الذل رفيق اوقاتنا بس نشحذ كيس الرز المدعوم او نتسول مصرياتنا الي سرقوها اقذر  وافسد طبقة سياسية حاكمة على  الكرة الارضية قاطبة …رغم كل الظروف القاهرة الله يخلي كل احبائنا ويرحم امواتنا وينشلنا من براثن الاحزان والأوبئة والأمراض ..

مع تمنياتي بدوام الصحة والعافية للجميع وعيد مبارك لاهلي واصدقائي في لبنان والعالم العربي