وجّعني غيابك قد ما وجّعني وجعك بآخر إيّامك

الشاعرة جوليات أنطونيوس

النشرة الدولية –

وجّعني غيابك قد ما وجّعني وجعك بآخر إيّامك ..

حزني كامش قلبي وعاقد لساني وفكري مش مستوعب إنّك  فلّيت .

بس اللي بيعزّيني إنّو ربّي عطاني نعمة إنّي كون  حدّك رافقك لآخر نفس ,

جرّب إشبع منّك قبل ما يسرقك منّي الموت متل ما سرق إمّي ..

جرّبت إمنعو وواجهو هالمرّة تركت كل شي لحتّى ما إسمحلو يستغيبني بس بالآخر هزمني فيك قبل ما إشبع منّك .

بعترفلك إنّي أوقات كنت إتعب بس كنت إتذكّر قدّيش إنت وإمّي تعبتو  قدّامنا لحتّى وقفنا عا إجرينا , ومرّات كنت إنزعج لأنّي عم قصّر مع ناس بحبّن وبيحبوني بس كنت إتذكّر قدّيش كنتو تتخلّو عن إشيا بتبسطكن كرمالنا ,ولا مرّة فضّلتو حدا أو شي علينا . , كنت بعرف يا بيّي إنّو كل شي بالدني بيتعوّض بس اللحظة اللي بكون فيا معك مش رح تتعوّض أبدااا .

بعرف إنك مرتاح مطرح ما إنت ومع هيك سامحني ما فيّي ما إحزن وما فيي ما إشتقلك وإفقدلك , علّمتني كون صلبة بس ما خبّرتني إنّو موت البيّ  بيهد الجبل وبيكسر الضهر , علّمتني الشعر بس ما خبّرتني إنّو لمّا يكون الحزن أكبر من القلب وحدو الدمع اللي بيحكي .

بشكرك يا بيّي لأنّك تركتلي أغلا شي بالدني إسمك اللي برفع راسي فيه وبفتخر فيه , وتركتلي رضاك اللي رح يرافقني دايما ويحميني  ويحمي عيلتي ..

اشتقتلك ورح ضل مشتاقتلك إنت وإمّي لحتّى نلتقي ..