كيف ما كنت بحبك، لكن..
بقلم: باسكال حرب

النشرة الدولية –

بحلم فيك البلد لبنان لقال عنه الله انه مجده الخاص

بحلم فيك منور ونضيف، موحَّد ومِلتحم وقوي ومُحتَرَم وآمن.

بحلمك يا وطني بلد القانون والثقافة والعلم والاستشفاء والفرح، بلد عندو قيمة للإنسان، بحلم بسلطة بخدمة الشعب مش وطن وشعب بخدمة مصالح السلطة وكل مين ايدو الو..

بحلمك الهدية لما بتساعها عِلَب، والعيد لما بيفتقر لبهجتو ، العشا العائلي الما بيغيب فيك ولا مسافر ولا مخطوف ولا منفي ولا مُغَيّب لا طوعاً ولا قصراً و ولا مقتول.

بحلم فيك الأم لبتسأل عن ولادا وبتدافع عنن وبترفع عنن الذل، السهران على حبابو

ااااوفففف يا بلدنا شو حلمي حلو عنّك وااااافففف شو حلو شعبك لما يكون عمينتفض عالظلم والحرمان.

قديشك قوي يا شعبي وقت ترجع تشتعل بالحياة من تحت الرماد، تنفض التراب عن جوانحك لِ دفنوها بالحيا وتفردها لتطير صوب شمس الحق والحرية!!!

بدن يقولوا مجنونة؟ يمكن مجنونة بإيماني فيك، والجنون فنون، انت يا وطن الفن والشعر والفكر والوجدان والقداسة والابتكار والخَلق  يا لب-انان يا قلب الله يا زهرة الحرية لعمتنبت بفصل جديد، يا راية العز الما بتوطى. يا زَرِع ما بيدبل، يا جرار قانا وعين كوكبا الما بتنضب خيراتها.

وبيقولي ليه عم بصمد؟ ليه عم ثور؟ بتلبقلك الثورة، بتستحق الصمود فيك، قالولي ممولينك بقلن ثمني شعبي و وحدتو، قالولي فلتانة بتضلي عالطرقات، بقلن الي الشرف نام بأحضان الوطن واتمتع بطلعة شمسو عند الصبح وبتستحق اصرخ  تتكون مسكن آمن لشعبك ومنستحق نعيش الحلم عَ أرضك..

لبنان انت الأمل، انتَ النفس، انت القلب والروح.

والحلم ت يتحقق بدنا نفيء ونتّحد، واضمر لخيي متل ما بضمر لنفسي لكن مصلحة الوطن أولاً !!

صباح الأحلام ل رح تتحقق اذا مش اليوم بكرا، فينا كلنا ولإلنا  كلنا، صباح ال #كلنا_للوطن

♥️ #غالي_يا_وطن  #لبيك_يا_لبنان!

❤️ لتخلص الدني 🇱🇧