النهر كاس.. وْتدور بْسِرّو أخماس بأسداس

الشاعرة هالة نهرا

النشرة الدولية –

النهر كاس.. وْتدور بْسِرّو أخماس بأسداس.. تشرب من شفّة خمرو عيد؛ تفيض المسبحة عَ ضفّة القلب وتشِقّو برشَق تشويق يْسوسِح بيادر شوق تلوّى.. الوتر مقصَّب عَ جناح الحجاز وكل عين تسمع.. بالوقت بدل الضايع يصير الخريف نافورة مرجان ويضِيع العَدّ.. جاييكم بعد الجَزر المَدّ.. يا حاملين بخّور وشعلة حِبر من بْعيد… ناطركم زنبق المَيّ الأزرق وزهرة الضفدع وورد النيل.. وسهم المَيّ الوَرَقو عريض يفوِّح خُصَل الشمس عَ زنود شمَّرِت المسافة بالليالي البيض.. هيدا الإسمو فَيّْ صار خيّْ وفاتت السما بخرم إبرة المجد لتغزل حلم المهد.. والغربة عم تخبز قمرنا صاج وتغمّسو بدبس خرّوبنا.. آه؛ الصبح فينا قرَّب عنّا يفتّح جفون شمّ النسيم.. والحكمة تلات ارباعها بصناديق مقفّلة تندر شمعة للشحن.. والمركب نور طايف حول الدني وصار واصل.. بزهر طاولة يلْعَبو ساحر بتصير الدني غير دني.. إذا تأخّر مرسال الميّ ابتهِل لخيرو وزيد.. حمياني بالأرض ولازمها حَلّ.. وطربون الحبق ما فرفح لو ما آمن بالجَلّ.. والجَلّ قلوبنا بالسواقي.. والنهر طرب يهدر بالبحر.. والدني نقطة يرسمها الشِّعر.. شو زغيرة الدني وتلت الحاكمين العالم ريح صبيانية خوْتا كتير.. بعد كانون الشتي بيهون.. والدني دوّارة.. يلّي أوّلو شرط آخرو نور.. وإيدَك وحدا متل شمس كانون وكستنا عيونك للدني فصل خامس جديد..! يا لْرمشك للأرض لحاف… وَالِفْ رفوف الرفيف بالصدى.. شهوة المسك نهر حليب اللوز ومن صوتِك يا حروفي الكحلى بتشرق غمرات دُوّار الشمس عالدني أحلى.. وقناطر النهر بلبنان بخوابي السطر يقراها الدهر..

جميع الحقوق محفوظة ©