مساكن les personnes rigides

فاتن فازع

النشرة الدولية –

مساكن العباد اللي ما يعرفوش يحبّوا ، تحرموا من قدّاش منّ كونكسيون مزيانة ، من échange مزيان ، تحرموا مالقرب من برشة أرواح مزيانة

مساكن les personnes rigides

اللي ما ينجّموش يطيّحوا السور اللي بينهم وبين العباد ، اللي تخوّفهم دمعة والا لحظة ضعف ، اللي ماشي في بالهم القوّة هي أنك ما يزعزك شي وما يحركك شي ، وقتلي القوة هي أنك تعيش منسجم مع قوتك وضعفك والفراجيليتي متاعك، أنك تقبل روحك كيما انت بلاش ماسك تتخبّى وراه

مساكن العباد اللي ما عرفوش وقفة الجيران وقت فرح والا قرح وقتلي البيبان تتحلّ ، واليدين تتمدّ ، وتحس جيش واقف معاك

مساكن اللي ما عرفوش آش معناها صاحب / صاحبة يضحك عليك ومعاك على ديفواتك و حاطط مكبّرة يخزر بيها ل tes qualités humaines

مساكن اللي ما عطاوش وبعد ما لقاوش الصوت اللي باش يهنيهم ، واللي باش يتخنق بالبكاء وهو فرحانلهم

مساكن اللي ils ne s’émerveillent pas قدّام جمال الحياة

اللي ما تحرّكهمش موجة البحر ، ما تحرّكهمش غناية ، ما تحرّكهمش ريحة ، ما يحرّكهمش پاساج في كتاب ، ما تحشّمهمش خزرة كبير الحومة وما عرفوش شمعناها ولد الحومة كي يولّي خو في بعض المواقف، الجارة كي تولّي أمّ ، الصّاحبة كي تتجنّد وتولّي أخت … البراينيّة اللي تحطهم في ثنيتنا الدنيا ويدخلوا يرمّموا المكسّر ، يداويوا المرضرض ، يخزروا بعينين الحب و ils investissent

Car les relations humaines c’est comme une entreprise

تدخل بالأسهم متاعك ، وتبني وتكبّر ، تخسر ساعات آما ديما توفى وانت الرّابح كي تحط من قلبك … خاطر الحب والكره يرجعوا على مولاهم ديما