الحلو حلو متل الندي بجرود النعَس

القصيدة للشاعرة هالة نهرا

النشرة الدولية –

الحلو حلو متل الندي بجرود النعَس، والزعرور تيمَّم بْموج الجرَس.. الغمزة شلحتْ فردِة حَلَقها عَ نمَش التلال ودُوزان الهوى لفَح الهوا… والقافية سهيانة بالغمّيزة تِتغندر عَ كَيفها.. وجَنّ الوزن بْقرن الغزال… دخْل الجمال؛ كيف طاف الربيع بجفن البدوي والحنطة هلقد نِغشِة والبسمة وِزّال فوق همزات مهيوبة تكاغي السؤال.. دخل إسمك يا موشَّح معتّق من زنجران الأندلس يشرب هون من تِمّ الشمس ويفوِّر السما شلّال.. عَ ابْراج نايمة بزعفران المجد وسبع بهارات اللهفة والحنين لصُبُح جايي كان ولد عم يلعب لقّيطة… اسآل عن الرّْفيق قبل الطريق والفرَس هِيِّ بتعرف خِيّالها.. ولاقيك بالنصر فاتح بوّابة العصر، وما تغفى نجمة قبل ما تلفّ زُوّادة خَيّها الفجر.. وتخلع غال السكون لنرشّ الدني بملح ينوّر حارات الأرض.. وتقلّي قولي بعد.. وطرِّزلَك من خبايا الحروف جسور تهلّ عالوعد.. ويطبع الضوّ الليل توتةْ عِلَّيق زغيرة على افران خصر صوتو…

يا حبّ.. يا دِرَّيق العمر؛ من طين بلادك علّي عمادك.. لولِح بمنجلك والغار.. النوى بدّو قِوى.. والتفّاح يناغش بحّة وْشاحو ويسنّ سنان العيد وقوس نشّاب المسافة محبرة بلهب الحديد.

جميع الحقوق محفوظة