(فيديو) لن ننسى ما دام الضمير يسكن الذاكرة والذكرى

النشرة الدولية – كاتيا سلامي –

لن ننسى ما دام الضمير

يسكن الذاكرة والذكرى

……عَنبر ١٢….

قالوا صغير ….

بَعدو بْعُمْر الوَطَنْ جِهْلانْ

ما بيَعرِفْ مينْ صْحابو…

صَبْغِةْ نَدَمْ عُطيوهْ

مَغْزولْ مِنْ بِرْكانْ

سُؤالْ وهَيْكْ قالوا جَوابو….

مْخَبّى بِقَلبو رَعْدْ ،وجَمْرْ مِطْفي

عَمْ يِحْرُقْ جْنابو….

هَيْكْ قالوا

يِمْكِنْ بَرْق ، يِمْكِنْ رَعْدْ

أوْ هَزِّة هَدِّتْ رْكابو…

ساكْنو شَيْطانْ مِنْ ألْغامْ

وْبِالدَمْ عَمْ يِكْتُبْ كْتابو….

قالوا

عَنْبَرْ مَشْلوحْ مِن أزْمانْ

وِالعَنْكَبوتْ شالِحْ تَوبو على بْوابو….

مَهْجورْ حَديدو تَنَكْ بِرِنْ

وْإبْليسْ عامِلْ حْسابو….

إبْليسْ لا….!

شَيْطانْ مِنْ إنْسانْ

رِدّوا

قولولي مينْ لْ جابو….؟

شَعْبي عَمْ يُصْرُخْ وَجَعْ

وِالسْكوتْ سِكّين عَمْ يِقْطَعْ رْقابو…

ما بيِكفيهْ شَعْبي  ذِلّ ووَجَعْ

ما بْيِكفيهْ جوعْ

وِالمَوتْ عَمْ بِلَمْلِمْ خيرِةْ شَبابو….

وبَيْروتْ …آه مِن بَيروتْ…

لْ عَمْ تِحْضُن روحْ الشَهيدْ

وِتْفوحْ ريحِةْ عَنْبَرْ مِنْ تْيابو….

عَنْبَرْ لا

ريحِة شَهادِة

ريحِةْ وَطَنْ

وِعْيونْ مِتْل شْموع عَمْ بِتْدوبْ

عَ فِرقِةْ لْغابوا….

وَجَعْ …وَجَعْ

عَمْ تُصْرُخْ بَيروتْ

عَمْ تْنادي وَطَنْها

يِخْلَص مِن عَذابو….

قِرصانْ يا هَالمَوْتْ

يا غِبِنْ بَحْرنا فيكْ

راحوا لي كانوا مِتْلْ رَشِّةْ مِلْح بْهالدِني وْدابو….

وِالبَحرْ مَوجوعْ

عَمْ يُصرْخْ …”يا الله”…

رِدّي يا بَيروتْ

قوليلو لَ رَبْنا يِفتَح بوابو….

وعَلَم لِبنانْ بِالأرزِة عَمْ بِلوحْ

عَمْ يِسْألْ الحِكّامْ

لَيْشْ بَعْدُنْ لَهَلّقْ ما تابوا….

عَنبَر ١٢ …

عَنبَرْ المَوْت سَمّوكْ

وبِالمَوْتْ وَصَّفوكْ

وبِحُضْن الضَميرْ خَلّوا الدَم

يوصَلْ على رْكابو….

طُغيانْ

مِنْ ظُلْمْ إنْسانْ

بِالعِهْر كَشَّرْ عَ أنْيابو…

ظُلاّمْ

لِعْبوا بْمَصيرْ الوَطَنْ

وْكانوا مِنْ رُوّاد إرْهابو….

هَدّوا بْلادْ المَعْرِفِة

شَرَّدوا بْلادْ الحَرْفْ

زَرَعوا الطائِفِيِّة  بِنْفوسْ طُلاّبو….

قَسَّموا الأديانْ غَيَّبوا الإحْسان وِالفِتنِة لِعْبِتْ بِأحْزابو….

مينْ هَدّ الوَطَنْ

مينْ لِعِبْ على أوْتارْ مْحَبْتو

وشَدّ بِأعصابو….

مينْ شَرَّدْ الإنسانْ

مينْ دَمَّر لِبْنان

وجَرَّدْ وَطَنّا مِنْ كِلْ ألْقابو….

بَيروت يا بَيروت

الحَق ما بِموتْ

رَحْ يِرْجَعْ لِبْنانْ وْإيد بْإيدْ

رَحْ نُقْطُفْ وَرْدِةْ الحُرِّيِة

وِنْقَدِّسْ الشَهادِة

بكِلّ حَبِّة مِنْ تْرابو…