مبارح* جوليات انطونيوس
النشرة الدولية –
مبارح أنا وعم سابق الفكرة
كرجِت عَ جفني كمشة خيالات
غبّش الماضي لمعِة البُكرا
بِمراية الكلمات ..
بلّشْت قلّب دفترِ الماضي
وغمّق سطور الحِبر يلّلي باخْ
عبّي غِيابك مطرَحِ الفاضي
وإمسح غبارالْ فوق حبّك شاخ
جِرّبت لمّع صورةِ الحسْرة ..
اشْهَق بِجولة وإبتسم جولات
والدمع مالِح زوغل النظرة
دَوْبل بِعَينْي صورتك مرّات
صارت الدنْيِي كلّها مرايات
تِخمين إنّي عْلِقتْ بِالذِكرى ..