عالشعر مر الوقت* ميشال دمعة
النشرة الدولية –
عالشعر مر الوقت ..
بعدو الشعر بردان…
بعدو عذات النغم
بيصيح غطّوني…
كلما بشوفو صحي ..
بيترنّح السكران…
وبيقول سم البشر ..
ما عاد تسقوني….
…… ..
كنت بشبابي ملَك…
مخلوق للقصدان…
وعا كل منبر غنى..
الاقطار سمعوني..
ومن قبل آخر نبي ..
كانو الانس والجان..
بايام حزن وصفا ..
قرآن يتلوني….
……… ..
كنت بزماني وحي ..
اخلق معي رهبان…
ركّب معاجز ولي ..
والكل عرفوني…
سيّد بقصري والي ..
بقبو القصر سجان..
حابس مسوخ اللغة
بظلمات مدفونة…
………
كنت بزماني طفل ..
امشي على الاوزان…
اهلي قوافي السبك..
عالسطر ربّوني…
لو ضاع مني حرف ..
يتزلزل الميزان…
ومن دون وزن الورق..
بيغلّق عيوني…
……… .
ومن يوم صار العمر ..
يصبغ بهالالوان…
بالشيب لون الخمر ..
والتلج صبغوني…
لعبة وتجارة صرت..
عا منبر الصبيان…
مليون اسم ونعت..
ياحيف سمّوني…
… ..
لو كنت بعرف انا ..
رح البس الالحان…
من فكر خالي الوحي..
وافكار مجنونة…
ما كنت عمري اخلقت ..
جوا القلوب لسان..
يحكي باسمي حكي ..
ويقول غنوني…
…… ..
يا حروف جيبو كفن..
ما بتلبسو الابدان..
من توب ماضي الي ..
وبالليل لفّوني…
ومطرح بيعجز الو..
يوصل بني انسان..
هونيك جنب الوحي..
يا حروف خلّوني..
