عيونن قواس النصر

النشرة الدولية –

جوليات انطوانيوس

عيونن  قواس  النصر

وتقال ..

كتار الْ عليهن علّقو  روحن

من وقت ما البركان بالكل انفجر

بالمطرح اللي نزفت جروحن

شكّو المصل واسترجعو الآمال

عيونن سلال العرس

لمّا اليأس عالتخت إيدو مال

وقرّب يشلّ النفَس ..

يطلّو قبل ما يدق عاللوعة الجرس

شمس  الأمل بعيونهم شلّال  ..

ومتل العجيبة بْلا لمس

يوعى الأمل ويقول ماشي الحال

وشو قلال يلّلي عيونهم غابة شمس

عم تحترق ممنوع يطفيها النعس

ويتبسّمو ..

وممنوع بالسر اليأس

يمرق ع درب  البال  ..

وجوهن معارك وقت

بين الّلهت   واللّهت

وبيناتهن وجه الشبه

عليهن قناع الطب شد وما انتبه

متل نَحَتْ حالو  عا وجّن نحت

والموت بعدو  ملمّع نيابو رمح

بلعنة  لئيمة بتلبس الأنفاس

تتصير تقتل بعضها هالناس

وياكل قلوب ال قرّبو صوب الفرح

وقّف  عمهلك وانتبه  يا موت

في جيش أبيض رافض الإهمال

قص الوقت عا قد ما في تخوت

ضلوعو فتحها للعلاج بيوت

بدّك عا صدرو تدق حتّى تفوت

هل شاف موتو روح للأجيال

كرمال ما يموت  الوطن بيموت