لبنان الاخضر والقبح في وجوه ونفوس كل المجرمين من ناهبي وسارقي خيراته

النشرة الدولية –

ميساء عبد الخالق –

لبنان الاخضر والقبح في وجوه ونفوس كل المجرمين من ناهبي وسارقي خيراته شو بشع هالشعور عند اللبنانيين لانو صرنا اتعس شعوب الارض قاطبة  واشبه بجثث متحركة عايشين بحياة ما بتليق بالبشر او بأي كائن حي غير بشري ، تحولنا ل ربوتات وانحصر تفكيرنا اليومي انو نلاقي محطات البنزين فاتحة، ماتكون الطرقات مقطوعة، نلاقي حليب لاولادنا، نلاقي دواء لكبارنا، نقول الحمدلله مات مش اهون ما يمرض ويدخل مستشفى، نيالو مسافر وبيقبض دولار، حرام بيقبض لبناني، وصرنا نعتبر  اساسيات الغذاء مثل اللحمة والجبنة والدجاج من المحرمات وما تدخل ع بيوت الاسر المتعففة، وصرنا نخاف نموت برصاصة طايشة على افضلية تعبئة بنزين  ..وجعنا ما بيخلص يا لبنان والحزن والقهر مش بس لانو تبهدلنا وانذلينا لانو شوهوا اسمك بالعالم يا وطني الحبيب دون ان يرف لهم جفن وما زالوا يتناتشوا جثتك طمعاً في هذا المقعد الوزاري او ذاك على حساب كرامة شعب وبقاء وطن.

لبنان الله يكون بعونك وينشلك من ايادي طبقة سياسية بلا ضمير ولا وجدان  لانو نحن الشعب ما بقى فينا نحمل اكثر قهر وذل …ملاحظة :اخترت حط صورة حلوة لانو لبنان حلو ورح يظل لبنان الاخضر والقبح في وجوه ونفوس كل المجرمين  من ناهبي وسارقي خيراته.