هدية معجونة حب
كارولين زعرب طايع
النشرة الدولية –
دقولي اليوم من ال liban post
مدام كارولين إلك بريد اذا بتمرقي تاخدي لأن ما بساع بصندوق البريد
مين باعتلي بريد ما بساع بصندوق البريد
تحمست ونزلت
تفضلي مدام هيدي العلبة لإلك
مسكتا إسمي علَيا ورقم تليفوني ومكتوب fragile
قلت علبة بسكويت ممكن ب تتكسر
بس انشالله يكون يلي باعتها باعت معها راحة الحلقوم
وفكرت قلت حدا عامل ضرب فيي بيعرفني بحب البسكوت والراحة
ما قدرت أنطر ت أوصل ع البيت
شي إنّي قعدت بالسيارة فتحت العلبة
وإذ…
مرطبان مربى التين ومرطبان رب البندورة
من صديقة عزيزة ع قلبي بتعرفني بحب مربى التين وعملتن وبعتتن بالبريد لأن عايشة بمنطقة بعيدة عني
شو فرحت بهالهدية ورجعتني بالإيام ل ورا
وقت كان يجي ل ماما شي كادو من الأرض أو صنف حلو شغل ديات جارتا او صندوق بندورة جبلي من عند الخوال
إمّي
معقول هلقد فرحانة بهالهدية
كانت دايماً تقول
يلي بيعطيك من خيراتو
ومن شغل دياتو
بكون عم يعطيك هدية معجونة حب
أكيد بتكون أحلى هدية
وأغلى هدية
صديقتي الغالية
بشكرك ع هديتك
فتحت مربى التين ع الوصلة
وأكلت لقمة
شو طيبين
فيهن نكهة خاصة
نكهة حب
