بمناسبة اليوم العالمي للغة العربية ١٨ كانون الأول

النشرة الدولية –

كارولين زعرب طايع

كان استاذ العربي بالمدرسة كتير يشدد علينا وين لازم نستعمل النقطة و وين لازم نستعمل الفاصلة وكنا كتير ننزعج منّو بس يشيل علامات اذا غلطنا

كان يقول ما فيك تحط الفاصلة محل ما بدّك

بس بدّك تحط الفاصلة بكون بدك تكمل مشوار الحكي

ما فيك تنهي الجمله بس تتنهيا من دون مغزى هيك كيف ما بدّك

نهيا الها معنى ونهيا بنقطه ….

ويخبط بإيدو ع الطبقه ….

أوعا تنسا النقطه

بوقتا ما عطيناهن اهمية

نقطة او فاصلة شو بتفرق

غلطة … وبتمرق

واليوم… تذكرت استاذي …

ورجعت لدرس القواعد

وفي اشيا حطيتلّا فاصلة

وفي اشيا حطيتلّا  نقطة ع السطر.

تحية احترام وتقدير  لكل أستاذ وأستاذة لغة عربية علموني أو علمو ولادي أو تعرفت عليهن وبعدن رافعين راية لغة الضاد

وتحية لكل شخص بحب هاللغة وبصر ع إستعمالها ان كان بالتاليف او بالغناء او بالمسرح  او بالإعلام إلخ….

وتحية لكل ام بتحارب كرمال يضلو ولادا يحبو اللغة وما بتقول شو بدن بالعربي

ورح نضل نكتب عربي ونحكي عربي ت تخلص الدني