كنت صغيرة وتحمليني ع إيديكي
كارولين زعرب طايع –
النشرة الدولية –
كنت صغيرة وتحمليني ع إيديكي
وتضلي تهزيلي ت إغفى
كل يوم بس ترجعي من الشغل أوقفلك ع الباب
“وين العلكة”
بس خطبتِ ويجي عمي ساتر ل عنا زيارة ت يشوفك غار منو واقعد بالنص
واذا عيطتلي امي حط المخدة الفرو الصفرا بينك وبينو وقلك اوعا تشيليا
وقت تجوزتي وتركتي البيت عملت حرارة اربعين وضليت ابكي كل الليل ت حتى امي حملتني الصبح بكير وراحت لعندك ع الأوتيل
كنت كل نهار سبت تشليلي صحن المجدرة المصفاية لأن بحبا وما تخلي حدا ياكل صحني ت بس خلص مدرسة امرق اتغدى قبل ما ارجع روح ع الكشافة
وع عيدي ولا سنة جبنا كاتو لان منعرف انو خالتو ميلاني رح تنزل وتجيب كاتو شغل دياتا ومش حيلّا كاتو
ليلة عرسي .. ومساقب عرسي نهار عيد ميلادي
فتّي حاملة قالب الكاتو
وصرخت…. كمان الليلة
عبطتيني وقلتيلي واذا سهرة عرسك معقول عيدك يمرق بلا كاتو شغل دياتي
وطفيت آخر شمعة عزوبية شغل دياتك
هودي مش ذكريات
هودي مونة محبة ما بتخلص
عقبال المية
ومعجونة بمونة محبتك الهدية