خلص الحكي* حسين الزين
النشرة الدولية –
خلص الحكي ماعاد ينفعنا
ولافي مبرر بعد يقنعنا
الهيكل وقع وتعقدوا الاحوال
من كفر حاكم سؤ لوّعنا
خلص الحكي والكذب والاقوال
ياما وياما كتير رقّعنا
ثلاثين عام وشو بقي مانقال
وحدو الكذب عشعش بمسمعنا
سرقتوا الوطن يااقذر الانذال
والعمر. معكم سم جرّعنا
الكبير فيكم سارق ومحتال
الله يلعن مين جوّعنا
ياشعب فيق وحطّم الاغلال
اغلال فيها الجهل ضيّعنا
غير الكرامة مابقي رسمال
والذل قرّب من مضاجعنا
ياشعب كافي نوم عالاذلال
بإيدك خلاصك والسما معنا
ماعاد بدها كتير قيل وقال
يمّا سوا منروح عالتغيير
يمّا منسكت عامواجعنا